عامه مش بحب أجزاء الأفلام لأن دايما اول جزء من الفيلم بيبقى الأفضل بس فى أفلام كتير قدرت أنها توزن المعادله وتقدم أجزاء جميله ولا تنتقص من الفيلم الأصلى بل تزيده
هنا الفيلم كان إضافه للسلسه ...
الفيلم بيبدأ بشخصيه من الشخصيات اللى بقت مشهوره أكتر من الأبطال ذات نفسهم ... السنجاب اللى طول الفيلم نفسه فى بندقه ... ^_^
وبمشاهد فى منتهى الجمال بشوف إزاى السنجاب كان سبب فى أن العالم ينقسم إلى قارات ..
بعد كدا بنشوف أبطالنا وبيبدأ الفيلم بمقارنه بسيطه بين عائلتين عائله مانى المكونه منه وزوجته وبنته اللى بقت دلوقت مراهقه ومانى بيخاف عليها خوف لا يطاق بالنسبه لها ... وعائله سيد الكسلان اللى رمياه وبتتهرب منه ...
المغامره الحقيقه بتبدأ لما القارات بتنقسم وبتفرق القطيع ... لتبقى ايلى وبيتشيز عائله مانى على الارض ... ويبقى سيد ومانى ودييجو وجده سيد على قطعه جليد متحركه تايهه فى المحيط ... لينقلهم المحيط فى مغامره رائعه هيواجهو فيها وحوش بحريه وعواصف وقراصنه لحد ما نعرف هايقدرو يرجعو ويلاقو بعض تانى ولا لأ ؟؟
رأيي الشخصي أن جمال الفيلم كان فى المغامره نفسها اللى كانت شيقه جدا وكان افضل شخصيه فى الفيلم بالنسبه لى سيد وجدته ... كانو بجد اكثرهم اضحاكا
الفيلم القى الضوء على مشاكل المراهقه وكون الشخص مش عارف مين أصدقائه وممكن يمثل انه شخصيه تانيه بس عشان يكسب اصدقاء "كوول " يمكن الفيلم ما اضفش للنقطه جديد..
بردو هو اتكلم عن ان فى بعض الاوقات ناس من دمك وممكن تكون مش عائلتك وناس أقرب للعائله وهما مجرد اصدقاء والتعريف دا انطبق وبشده على سيد ودييجو ومانى
الفيلم عامه لا يدعى العمق وقدم وجبه خفيفه للاطفال والكبار وكان مستواه جيد جدا الحقيقه
تقييمى
6\10
تقييم IMDB
6.7 \10
شاهد الفيلم وشاركنا بمشاهدك المفضله وشخصيتك المفضله ..
:)
إرسال تعليق Blogger Facebook